Parseria ba Dezenvolvimentu Aquikultura iha Timor-Leste
Kamis,
Dili-

Akordu rua ne’ebé sei promove Aquikultura hanesan dalan ida hodi hadia nutrisaun no reduz kiak asina ona ohin iha Timor-Leste hanesan parte ida selebrasaun ba Loron Aihan Mundial nian.

Akordu parseria ne’e lori hamutuk Ministeriu Agrikultura no Peskas (MAP) Timor-Leste no Ministeriu Negosiu Estranjeiru no Komersiu (MFAT) Nova Zelandia nian no fo hanoin papel importante katak Aquikultura nia knar  bele kontribui  hasae rendementu no liu-liu asesu ba hahan ne’ebé iha nutrisaun barak.

Tuir Organizasun Aihan Mundial (FAO), Timor-Leste hanesan rai segundu iha mundo ho nivel stunt (labarik tinan as maibe todan kiik) as, nivel malnutrisaun sai kauza ida ne’ebé fo Preokupasaun Bo’ot. Hamutuk ho parseiru sira sei suporta implementasaun Estratejia Dezenvolvimentu Aquikultura Nasional (2012-2030), ne’ebé ho objetivu atu reduz mal-nutrisaun liu husi hasae numeru konsumu per kapita ikan husi 6kg ba 15kg iha tinan 2020.

Projetu “Parseria ba Dezenvolvimentu Aquikultura” ho montante osan millaun 4 Dollar Amerika  sei uja hodi dezenvolve industria aquikultura Timor-Leste, halao treinamentu, hadia planeamentu, dezenvolve fini ikan no hahan ikan no ajuda liga aqikultor sira ba merkadu. Projetu ne’e sei lidera husi Dirasaun Nasional Peskas no Aquikultura (DNPA) ho asistensia husi Institutu Peskiza ba Be no Atmosferiku (NIWA) Ltd, Nova Zelandia, WorldFish, Tisbe, no Instituto de Apoio ao Dezenvolvimento Empresarial (IADE) Timor-Leste.

Seluk tan, Akordu ida asina entre WorldFish no Ministeriu Agrikultura no Peska hodi formalmente estabelese WorldFish nia operasaun iha Timor-Leste sei haforsa diak liutan dezenvolvimentu seitor peskas no Aquikultura.

Ministru Agrikultura no Peskas, Excelensia Mariano Asanami Sabino hateten: “Ho asina akordu sira ohin loron ne’e marka parseria importante ida iha inisiu ne’ebé hau fiar katak seitor Aquikultura sei kontribui signifikativu tebes ba seguransa aihan no responde nesesidade nutrisaun povo Timor-Leste nian”.

Sekretariu Estadu ba Peskas, Excelensia Rafael Pereira Goncalves hateten: “Seitor Aquikultura kaer papel importante tebes iha seguransa aihan nasaun nian. Liu husi suporta ida ne’e, DNPA bele implementa nia Estratejia Dezenvolvimentu Nasional, fornese asesu diak ba hahan ne’ebé ho nutrisaun as ba labarik sira no inan isin-rua sira, kria oportunidade servisu no fornese rendementu sustentavel ba tempu naruk”.

Jonathan Schwass, Embaixador Nova Zelandia, hateten: “Projetu ida ne’e konaba fo han ema no mos hari’ekonomia liu husi kresimentu seitor privadu. Iha tinan ha’at tuir mai ita hakarak hare negosiu kiik iha seitor Aquikultura hamutuk 200 bele hari’i ona no mos kria fatin servisu hamutuk 600. Maioria iha distritu. Kada negosiu no servisu hirak ne’e sei kontribui ba dezenvolvimentu sustentavel Timor-Leste nian.”

Stephen Hall, Direitor Jeral, WorldFish nian hateten Dezenvolvimentu seitor Aquikultura sustentavel ida maka feramentas ne’ebé prova ona wainhira rezolve hamlaha no hadia moris loron-loron nian. Implementasaun planu ida ne’e sei hadia produtividade no mos disponibilidade ikan ho presu ne’ebé ki’iak sira bele sosa.

Ajensia implementador projeitu ida ne'e maka Departementu Akikultura, Dirasaun Nasional Peskas no Akikultura, NIWA, WorldFish, Tisbe, no IADE.


Atu hetan informasaun klean liu tan kontaktu:Timor-Leste: Domingos Goncalves, DNPA/MAF Telemovel: +670 773 12323,  Email: dgsalveson@ymail.com. Internasional: Toby Johnson, Senior Media Relations Manager, Telemovel: +60 175 124 606, Email: t.johnson@cgiar.org